Almennar sýningar á Mýrinni eftir Baltasar Kormák hafa staðið yfir frá föstudegi og samkvæmt upplýsingum frá Senu komu tæplega 16.000 manns á myndina nú yfir helgina. Uppselt var á flestar sýningar og urðu margir frá að hverfa. Björn Sigurðsson forstjóri Senu segir þetta mun meira en þeir hafi átt von á og bendir jafnframt á að þetta sé langstærsta opnun á íslenska mynd frá upphafi formlegra mælinga. Jafnframt sé þetta næst stærsta opnunarhelgi á einstaka mynd í íslenskum kvikmyndahúsum frá því mælingar hófust um miðjan síðasta áratug.

Samkvæmt þessu verður að telja góðar líkur á að myndin verði í hópi mest sóttu íslensku myndanna þegar upp er staðið. Guðmundur Breiðfjörð, markaðsstjóri kvikmyndadeildar Senu, gerir því jafnvel skóna að "ef maður ber saman byrjanir á öðrum risamyndum, hvort sem þær eru íslenskar eða erlendar, gæti Mýrin endað á því að slá út öll aðsóknarmet og orðið stærsta mynd allra tíma þegar yfir lýkur."

Þá ber og að geta þess að myndin hefur fengið nær einróma lof gagnrýnenda.

Aðsóknarhæsta íslenska myndin hingað til, skv. formlegum mælingum er Englar alheimsins eftir Friðrik Þór Friðriksson, en hana sóttu um 82.000 manns árið 2000. Næststærsta myndin skv. sömu mælingum er önnur mynd Friðriks Þórs, Djöfleyjan, sem fékk 75.000 gesti 1996. Sú mynd Baltasars Kormáks sem mesta aðsókn hefur hlotið er Hafið, en hana sóttu 57.000 manns árið 2002.

Í þessu samhengi er þó rétt að geta þess að ýmsar íslenskar myndir frá upphafsárunum eru sagðar hafa fengið meiri aðsókn og hafa heyrst tölur allt uppí 120.000 manns á Með allt á hreinu (1982-3). Þessar tölur eru þó ekki til staðfestar frá óháðum aðilum.

SMÁÍS (Samtök myndrétthafa á Íslandi) hefur undanfarin ár haldið utan um aðsóknartölur á kvikmyndir sem sýndar eru hér á landi.